Читать интересную книгу Типикон - Сборник

иерей глаголет: благословен Бог наш: И мы, Аминь. Таже иерей, Христос воскресе: трижды. Таже, Христос воскресе: трижды, на лики, якоже предызъявися в начале утрени. По Слава, и ныне, иерей глаголет: Христос воскресе из мертвых: Мы же, И сущим во гробех живот даровав. Таже, Слава, и ныне, впакои: Предварившия утро: Аще ли хощеши приложити канон коего святаго: Тогда глаголи прежде тропарь святаго, единожды: Слава, и ныне: Предварившия утро: Посем канон пасхи, со ирмосом на 6. Припев, Христос воскресе: и святаго, аще будет, на 4. Катавасиа, по 3–й и 6- й песни: спаси от бед: По 6–й песни, кондак и икос пасхи. Таже прокимен, глас 8: Сей день, егоже сотвори господь: Стих: Исповедайтеся господеви: Таже святаго прокимен. евангелие луки, зачало 114. Потом святаго. По 9–й песни, за Достойно, ирмос: Светися, светися: Таже, Христос воскресе: трижды: Посем впакои: Предварившия утро: Слава, тропарь святаго. И ныне, кондак: Аще и во гроб: Таже, ектениа, Помилуй нас Боже: Посем иерей глаголет, Премудрость. Мы же, Христос воскресе: трижды. Таже иерей вместо: Слава тебе Христе Боже: Христос воскресе из мертвых: И мы: И сущим во гробех живот даровав. И отпуст со крестом глаголет сице: Христос воскресый из мертвых: И прочая, яко предписася в конце утрени. Посем возглашает: Христос воскресе, трижды. Мы же отвещаем: Воистинну воскресе, трижды. И паки поем: Христос воскресе: трижды. Таже, Господи помилуй, трижды, с пением.

Последование литургии бывает порану.

Наченшу диакону: благослови владыко. Настоятелю же возгласившу: благословено царство отца, и сына, и святаго духа, ныне и присно, и во веки веков. И мы: Аминь. Настоятель поет с прочими служители во святом олтаре: Христос воскресе из мертвых, смертию смерть поправ, и сущим во гробех живот даровав. Трижды. И лики тойже, трижды. Настоятель глаголет припев, Первый: Да воскреснет бог: Лик: Христос воскресе: единожды. Вторый: яко исчезает дым: Христос воскресе: единожды. Третий: Тако да погибнут грешницы: Христос воскресе: единожды. Четвертый: Сей день: Христос воскресе: единожды. Слава: Христос воскресе: единожды. И ныне: Христос воскресе: единожды. Таже настоятель поет вышшим гласом: Христос воскресе из мертвых, смертию смерть поправ. Мы же: И сущим во гробех живот даровав. Посем глаголет диакон ектению великую. По ектении же, и по возгласе: Антифон 1- й, псалом 65, глас 2. Стих 1: Воскликните господеви вся земля. Припев: молитвами Богородицы, спасе спаси нас. Другий лик тойже стих: Воскликните господеви вся земля, пойте же имени его, дадите славу хвале его. молитвами Богородицы: Стих: Рцыте богу: коль страшна дела твоя! во множестве силы твоея солжут тебе врази твои. молитвами Богородицы: Стих 3: Вся земля да поклонится тебе, и поет тебе, да поет же имени твоему вышний. молитвами Богородицы: Слава, и ныне, купно оба лика, вышшим гласом: молитвами Богородицы: Таже ектениа малая. Антифон 2–й, псалом 66–й, глас тойже. Стих 1: Боже ущедри ны, и благослови ны. Припев: спаси ны сыне Божий, воскресый из мертвых, поющия ти: аллилуиа. единожды. Другая страна тойжде стих: Боже ущедри ны и благослови ны, просвети лице твое на ны, и помилуй ны. спаси ны сыне Божий: Стих 2: Да познаем на земли путь твой, во всех языцех спасение твое. спаси ны сыне Божий: Стих 3: Да исповедятся тебе людие Боже, да исповедятся тебе людие вси. спаси ны сыне Божий: Слава, и ныне: вкупе два лика: единородный сыне: Таже ектениа. Антифон 3–й, псалом 67–й, глас 5: Да воскреснет бог, и расточатся врази его. Тропарь: Христос воскресе из мертвых: Другая страна тойжде стих: Да воскреснет бог, и расточатся врази его: Христос воскресе: Стих 2: яко исчезает дым, да исчезнут: Христос воскресе: Стих 3: Тако да погибнут грешницы от лица божия: Христос воскресе: И бывает вход. И возглашает диакон, [аще есть, аще же ни, иерей.] Премудрость, прости. Мы же входное: В церквах благословите Бога, Господа от источник израилевых: И поем тропарь: Христос воскресе: впакои: Предварившия утро: Слава, и ныне, кондак: Аще и во гроб снизшел еси: Вместо же трисвятаго: елицы во Христа крестистеся, во Христа облекостеся: аллилуиа.

[Смотри] Подобает ведати: яко сие начало литургии, и антифоны, и елицы во Христа крестистеся: поем во всю седмицу светлую, даже до недели новыя.

Прокимен, глас 8: Сей день, егоже сотвори господь, возрадуемся и возвеселимся вонь. Стих: Исповедайтеся господеви яко благ, яко в век милость его. Апостол деяний, зачало 1: Первое убо слово сотворих: Аллилуиа, глас 4: Ты воскрес ущедриши сиона: Стих: Господь с небесе на землю призре. евангелие Иоанна, зачало 1. Времени же приспевшу чтения святаго евангелиа: Начальный диакон хотяй евангелие чести, глаголет: благослови владыко благовестителя: Таже настоятель глаголет: Бог молитвами святаго славнаго: и прочая, якоже указася в литургиарии. Исходит диакон, и на обычном месте прямо царских врат, на восток лицем станет. И настоятелю прежде возгласившу пред престолом: Премудрость, прости, услышим святаго евангелиа: Тожде и вси иереи, елицы суть служащии. По сих же и диакони глаголют, на различных местех ставше от святаго престола, и до западных врат церковных един по единому. Последи же всех стоит архидиакон. И чтут вси по настоятелю, един по единому по статиям, якоже настоятель расположит. И предначинает настоятель: от Иоанна святаго евангелиа чтение. Прочии тожде. Настоятель: Вонмем. Прочии тожде. Настоятель стоя пред престолом на восток лицем, чтет: В начале бе слово: и прочая. Прочии тожде. И на всяком возгласе или статии евангелиа, ударяют в церкви по единожды в кандию. Параекклисиарх же вне церкве в великое било, и в великий кампан. На последнем же возгласе ударяют во вся кампаны, и в великое било. И бывает по чину божественная литургиа златоустаго. Вместо, Достойно, поем: Ангел вопияше благодатней: Таже ирмос: Светися, светися: Причастный: Тело христово приимите, источника безсмертнаго вкусите. аллилуиа, трижды. егда же настоятель глаголет: Со страхом божиим и верою приступите. Мы же вместо, благословен грядый во имя господне: поем, Христос воскресе: единожды. Настоятель глаголет: спаси Боже люди твоя: И мы: Христос воскресе: единожды. егда же изглаголет иерей: Всегда, ныне, и присно. И мы, Христос воскресе: единожды. Посем ектениа. Вместо же, Буди имя господне, и вместо псалма, благословлю Господа, поем: Христос воскресе: 12, и множае, дондеже

Анафора от настоятеля антидор раздастся. Таже настоятель: благословение господне на вас: Лик: Аминь. Посем настоятель, вместо, Слава тебе Христе Боже, поет: Христос воскресе из мертвых: И лик: И сущим во гробех живот даровав. Посем настоятель глаголет отпуст со крестом по обычаю, якоже указася на Утрени.

[Смотри] Да будет же вестно и сие: яко врат царских олтаря, великих же, и от стран малых, по всем церквам во всю светлую седмицу не затворяем и во время причащения.

[Смотри] Ведомо же буди и сие: яко мяс православнии христиане к церкви не приносят, но в дом ко иерею.

молитва во еже благословити брашна, мяса, во святую и великую неделю пасхи.

Творит иерей начало: благословен Бог наш: Христос воскресе: трижды. Таже, господу помолимся. Господи помилуй. Призри Господи Иисусе Христе Боже наш, на брашна мяс:

молитва во еже благословити сыр и яица.

яица же и сыр принесенныя поставляются в притворе, в церковь же отнюд не подобает вносити. иерей же изшед глаголет: господу помолимся. владыко Господи Боже наш:

[Смотри] Вестно же буди: яко сицевый мяс и набелу принос, не есть пасха, ниже агнец, якоже нецыи глаголют и приемлют, и ему со всяким говением, якоже некоей святыни причащаются: но простое приношение. не аки бо сие в жертву Богу приноситися имать, но токмо да начинающим по посте мясо и сыр ясти, от иереа предложенными молитвами в снедь благословено будет: пасха бо сам Христос есть, и агнец вземляй грехи мира, на олтаре в безкровной жертве, в пречистых тайнах честнаго тела, и животворящия крове своея, от иереа Богу и отцу приносимый, и тому достойно причащающиися, истинную ядят пасху. И сего ради оныя приносы, яко не суть пасха, во олтарь или в церковь не достоит вносити, но вне церкве, или в притворе, молитвою благословити, по 3–му правилу святых апостол, глаголющих: Аще кто епискп или пресвитер, кроме вчинения господня о жертве, иная некая ко олтарю принесет, мед, или млеко, или вместо вина сикеру, сиесть, оловину, или медовину, или птицы, или кая животная, или сочива, разве гроздия в лете, и елеа на свещники и фимиама, во время литургии, да извержется. И по 6–му собору, иже в трулле, в правиле 99 глаголющу. И сему во арменстей стране бывати уведехом, яко нецыи внутрь во святых олтарех, части мяс варяще, приносят священником жидовски разделяюще.

Темже церковь непорочную храняще, узаконихом, яко не подобает ни единому же иерею различных мяс частей от приносящих приимати: но теми довольни да будут, яже приносящему возмнятся. Сицевому приношению бываему вне церкве. Аще же кто сего не сотворит, да отлучится.