Читать интересную книгу Типикон - Сборник

Тропарь и кондак, писан иуниа в 23–й день. Аще хощет настоятель, да поет службу ея со адрианом, якоже знамению Богородицы с мученком иаковом персским.

27. преподобнаго отца нашего пимена.

На Господи воззвах, стихиры октоиха 3, и преподобнаго 3, глас 8. Подобен: Что вы наречем: Слава, глас 6: преподобне отче, во всю землю: На стиховне октоиха. Слава, глас 8: Монахов множества: Тропарь, глас 8: Слез твоих теченьми: септемвриа в 3–й день. На Утрени, оба канона октоиха: и святаго на 4, глас 8. По 3–й песни, седален, глас 3. По 6–й песни,

Кондак, глас 4: Подобен: явился еси: Светлых подвиг твоих преподобне отче, наста днесь святая память твоя, души благочестивых веселящи, пимене Богомудре Отче наш преподобне.

И икос. По 9–й песни, светилен октоиха: Слава, преподобнаго. На стиховне октоиха. На Литургии, прокимен: честна пред господем: Стих: Что воздам господеви: Апостол к галатом: зачало 113: Плод духовный есть: евангелие матфеа, зачало 10: По Иисусе идоша народи: Причастен: В память:

28. преподобнаго отца нашего моисеа мурина: Стихиры октоиха 3: и преподобнаго 3, глас 8. Подобен: мученцы твои Господи: На стиховне октоиха. Тропарь, глас 1: Пустынный житель: септемвриа в 29- й день. На Утрени, оба канона октоиха: и святаго на 4, глас 8. По 3–й песни, седален глас 3. По 6–й песни,

Кондак, глас 4: Мурины заушив, и лица демонов поплевав, мысленно просиял еси якоже солнце светло, светом жития твоего, и учением наставляя души наша.

По 9–й песни, светилен октоиха.

29. (+) усекновение честныя главы честнаго славнаго пророка, предтечи и крестителя Иоанна: На малей вечерни, на Господи воззвах, стихиры на 4, глас 1. Подобен: небесных чинов: Слава, глас 8: предтече спасов: И ныне: владычице приими: Прокимен дне. На стиховне стихиры, глас 2. Подобен: Доме евфрафов: с припевы. Слава, и ныне, богородичен, подобен тойже: едина христиан: Тропарь, глас 2: Память праведнаго с похвалами, тебе же довлеет свидетельство господне предтече: показал бо ся еси воистинну и пророков честнейший, яко и в струях крестити сподобился еси проповеданнаго. темже за истину пострадав радуяся, благовестил еси и сущим во аде, бога явльшагося плотию, вземлющаго грех мира, и подающаго нам велию милость.

Слава, и ныне, Вся паче смысла: ектениа малая, и отпуст. На Велицей Вечерни, по обычном псалме: поем блажен муж, 1–й антифон. На Господи воззвах, стихиры на 8, глас 6: рождеству сотворяему: Слава, туюжде стихиру: рождеству сотворяему: И ныне: Кто тебе не ублажит: Вход. Прокимен дне. Чтения 3: 1–е, пророчества исаиина: Тако глаголет господь: утешайте: утешайте: 2–е, пророчества малахиина: Тако глаголет Господь вседержитель: се аз посылаю ангела моего: 3–е: Премудрости соломони: праведник аще постигнет: На литии стихиры самогласны, глас 1. Слава, глас 5: Беззаконнаго деяния: И ныне, глас тойже: Воспойте людие: На стиховне стихиры, самогласны, глас 2. Припев 1–й: праведник яко финикс: 2–й: Возвеселится праведник: Слава, глас 8: предтече спасов: И ныне, Безневестная Дево: На благословении хлебов, тропарь святаго, дважды, и Богородице Дево: единожды. и Буди имя господне, с пением трижды, и псалом 33: благословлю Господа: Конец: не лишатся всякаго блага. На Утрени, на Бог господь, тропарь предтечи, дважды. Слава, и ныне: Вся паче смысла: По кафисмах седальны предтечи: с богородичны их. И чтение: По полиелеи седален, глас 8, дважды. Слава, и ныне, богородичен. и чтем слово торжественно. Степенна 1–й антифон 4–го гласа. Прокимен: честна пред господем: Стих: Что воздам господеви: Всякое дыхание: евангелие матфеа, зачало 57: Слышав ирод четвертовластник слух Иисусов: По 50–м псалме стихира, глас 6: Пляса ученица вселукаваго диавола: Канона два: един, глас 8: со ирмосом на 8: и другий глас тойже, на 6. Катавасиа: крест начертав: По 3–й песни, седален глас 8, дважды. Слава, и ныне, богородичен. По 6–й песни,

Кондак, глас 5. предтечево славное усекновение, смотрение бысть некое божественное: да и сущим во аде спасово проповесть пришествие. да рыдает убо иродиа, беззаконное убийство испросивши: не закон бо Божий, ни живый век возлюби, но притворный, привременный.

И икос, и пролог. По 9–й песни, светилен предтечи: Слава, другий: И ныне, богородичен. На хвалитех стихиры на 4, глас 8. Подобен: о преславнаго чудесе! Слава, глас 6: Паки иродиа бесится: И ныне, Богородице ты еси лоза: Славословие великое. По трисвятом тропарь предтечи. Слава, и ныне: Вся паче смысла: ектении, и отпуст. и дается святый елей братии от кандила предтечева, и час 1–й. На 1–м часе, тропарь и кондак предтечи: и конечный отпуст. На Литургии, блаженна от канона 1–го песнь 3–я: и 2–го песнь 6–я, на 8. Прокимен, глас 6: Возвеселится праведник: Стих: услыши Боже глас мой: Апостол деяний, зачало 33: Во дни оны, якоже скончаваше иоанн: Аллилуиа, глас 4: праведник яко финикс процветет: Стих: Насаждени в дому господни: евангелие марка, зачало 24: Слыша ирод царь слух Иисусов: Причастен: В память: На трапезе утешение братии, кроме сыра и яиц и рыбы ядим дважды днем, аще среда или пяток.

[Смотри] Ведомо же буди, яко аще случится праздник сий в неделю, предваряет вся служба воскресна на вечерни и на Утрени, и На Литургии.

Зри постнаго сего устава на усекновение честныя главы предтечевы, древними святыми отцы в сей день завещаннаго. Суть убо нецыи предают качеству быти тогда снедей, а не посту, о том бо не возмогохом ничтоже обрести написано в различных типицех: но паче достоит в той день всяко воздержатися постом, за истину пострадавшаго пророка, и проповедавшаго во аде Господа. разрешению же быти точию на древяное масло, и прочая от различных овощнаго плода, и по мере единой чашице вина в славу божию, труда ради бденнаго. Всяко бо достоит нам в той день сетованием унылым быти, а не чревоугождение имети воздержательнаго ради жития святаго, и скверноубийственнаго кровопролития его от ирода: понеже усечена бысть глава предтечева на пиру плясанием блудныя плясавицы, и чревоугодием, и различных животных закланием и кровопролитием. нам же ниединаго от таковых животных, из нихже кровь изливается, но ниже рыб [кровь бо имеют, аще и в воде жительствуют, и от тварей животных суть] подобает вкушати: да не сообщницы явимся иродову чревоугодию. како бо крестителево честное усекновение почтити восхощемъ? мясо ли хощем ясти, или от иных различных брашен многоценныхъ? а он живяше в пустыни безводней, и безтравней: ни хлеба ядяше, ни трапезы имяше. вино ли пиемъ? а он никогдаже пияше вина, ни инаго пития мирскаго: ни в храмех живяше, но под каменем вкопався живяше. стол и трапеза, и одр ему бяше земля, разве нужды естественныя, единою днем вкушаше акриды и мед дивий: чаша же ему пригорщи бяше, а питие из камене текущая вода. Темже братие усердно почтим день сей молитвою и постом в целомудрии, отбежим пиянственнаго сего злаго нрава. аще бо кто неверствием одержимь будет, и узаконеннаго сего многоразсудительнаго повеления не сохранит, таковый зле пагубныя напасти постраждет: право содержащих же подвиг сей Господи благослови, и управи молитвами святаго предтечи.

30. Иже во святых отец наших, патриархов Константиня града, александра, Иоанна и павла новаго.

На Господи воззвах, стихиры предтечи 3, глас 4. Подобен: Званный свыше: и святых 3, глас 1. Подобен: Всехвальнии мученцы: Слава, предтечи, глас 6: Паки иродиа бесится: И ныне, богородичен, или крестобогородичен. На стиховне октоиха. Слава, предтечи, глас 4: Рождение неподобно: Тропарь предтечи. Слава, святых, глас 4: Боже отец наших: ноемвриа в 20–й день. На Утрени, на Бог Господь тропарь предтечи, дважды. Слава, святых: И ныне, богородичен, или крестобогородичен. По обычных кафисмах, седальны октоиха: и чтение. Канон октоиха един: и предтечи на 4: и святых на 4, глас 8. По 3–й песни,

Кондак святых, глас 8: христовою любовию распалаеми славнии, и ярем его приемшии крест честный, подражатели того жития явистеся, и божественныя славы его причастницы бысте, александре Богомудре со иоанном чудным, и павлом славным: темже престолу его предстояще, прилежно молитеся за души наша.

И седален предтечи, глас 8. Слава, святых, глас 4. По 6–й песни,

Кондак предтечи, глас 4: Ирод предтече беззаконновав, жене подаде главу твою честную, ейже покланяющеся веселимся: иродиа же плачет и рыдает, и ирод и плясавшая.

И икос. На стиховне октоиха. Слава, предтечи, глас 8: предтече спасов: + И пренесение мощей святаго благовернаго великаго князя александра невскаго, из владимира в царствующий град святаго петра.

Тропарь, глас 4: Познай свою братию российский иосифе, не в египте, но на небеси царствующий, благоверный княже александре, и приими моления их, умножая жита людем плодоносием земли твоея, грады владычествия твоего ограждая молением, и наследником твоим, благоверным императорам нашим, на сопротивныя споборствуя.